२०७९ माघ १८ गते, बुधबार

काठमाडौं । भागिरथा बानियाँ प्रतिष्ठान झापाले स्मरण शक्तिमा विश्व कीर्तिमानी (मेमोरी किङ) अर्पण शर्मासहित तीन फरक विधाका प्रतिभालाई लाल पुरस्कृत गरेको छ । सामाजिक क्षेत्रमा प्रेरक व्यक्तित्वलाई विगत चार वर्षदेखि प्रतिष्ठानले नगद रु ३१ हजारसहित सम्मान गर्दै आएको छ । सम्मानित हुनेमा मेमोरी किङ अर्पण शर्मा, असल गृहिणीका रुपमा दुर्गादेवी काफ्ले र उत्कृष्ट कृषक मञ्जुल मेचे रहेका छन ।
प्रतिष्ठानले रु १० लाखको अक्षयकोष नै स्थापना गरेर प्रत्येक वर्ष अग्र्यानिक तथा व्यावसायिक तरकारी खेती गर्दै आउनुभएका जिल्लाकै उत्कृष्ट किसान, ज्येष्ठ नागरिकको हेरचाह गर्ने असल गृहिणी र राष्ट्रिय तथा अन्तर्राष्ट्रिय क्षेत्रमा नाम राख्न सफल व्यक्तिलाई पुरस्कृत गर्दै आएको संस्थाका अध्यक्ष हरिचरण बानियाँले बताए ।
पुरस्कृत तीन जनालाई मेची नगरनगरपालिका प्रमुख गोपालचन्द्र बुढाथोकीले नगद रु ३१ हजारसहित सम्मान गरेका हुन् । कार्यक्रममा बागमती प्रदेशका पूर्वप्रदेश प्रमुख विष्णु प्रसाई, सम्मानित शर्मा, प्रतिष्ठानका सदस्य मोहन काजी, समाजसेवी शिव पौडेल, डिल्ली खतिवडा, हरिनारायण भट्टराईलगायतले शुभकामना मन्तव्य दिएका थिए ।