२०७० पुष १३ गते, शनिबार

काठमाडौं, १३ पुस।आज मध्याह्न ऐतिहासिक रामलीला मैदानमा दिल्लीको मुख्यमन्त्रीको शपथ लिँन आम आदमी पार्टीका संयोजक अरविन्द केजरीवाल पार्टी कार्यालयबाट मेट्रो चढेर जाने भएका छन् । समाचारहरुमा जनाइए अनुसार केजरीवालसँगै मन्त्री पदको शपथ लिने ६ विधायक पनि मेट्रोबाटै जाने छन् । केजरीवालले यसअघि मुख्यमन्त्रीका लागि दिइने सरकारी आवास अस्वीकार गरेका थिए , भीआईपी सुरक्षा पनि लिएका छैनन् ।
भ्रष्टाचारविरुद्धको आन्दोलनबाट उदाएका केजरीवालको आम आदमी पार्टी (आप)ले कांग्रेसको समर्थनमा दिल्लीमा अल्पमतको सरकार बनाउँदैछ । आपले २८ सिट जितेको छ र दिल्ली विधानसभाको दोस्रो पार्टी हो । ३२ सिट जितेको भारतीय जनता पार्टीले बहुमत पु¥याउन नसकेपछि आपले सरकार बनाउन लागेको हो ।
शपथअघि केजरीवालले भने –म मुख्यमन्त्री बन्दै छैन । दिल्लीको आम जनताको मुख्यमन्त्री बन्दैछु ।’ रामलीलामा शपथ ग्रहण समारोहमा आवका हजारौं समर्थक पुग्ने सम्भावना छ । शपथ ग्रहण कार्यक्रममा भ्रष्टाचारविरुद्धको आन्दोलनका अगुवा अन्ना हजारे, किरण बेदी र सन्तोष हेगडेलाई पनि निम्तो पठाइएको छ ।