२०७३ बैशाख १७ गते, शुक्रबार

काठमाडौं ,१७ वैशाख । उपप्रधान तथा परराष्ट्रमन्त्री कमल थापाले कर्णेल कुमार लामालाई छिटो मुक्त गरेर नेपाल फिर्ता गर्न बेलायत सरकारलाई आग्रह गरेको बताएका छन । तर बेलायत सरकारले भने आगामी जुन महिनासम्म प्रतिक्षा गर्न जवाफ दिएको बताइएको छ । कर्णेल लामालाई विगत तीन वर्षदेखि बेलायत सरकारले पक्राउ गरी थुनामा राखेको छ । उनीविरुद्धको मुद्दाको टुंगो आगामी जुन महिनामा हुँदैछ ।
बेलायत भ्रमणबाट शुक्रबार स्वदेश फर्किएका उपप्रधान तथा परराष्ट्रमन्त्री कमल थापाले सन्चारकर्मीसँग कुरा गर्दै भने, ‘कर्णेल कुमार लामाको मुद्दा लामो समयदेखि टुंगो नलागेकोबारे गम्भीर चिन्ता प्रकट गरें । विदेश मन्त्रीले अदालतमा बिचाराधीन विषयमा सरकारबाट हस्तक्षेप गर्न नमिल्ने तर दुई देशको सम्बन्धलाई ध्यानमा राख्दै सरकारले आवश्यक गर्ने निर्णय गर्छ भन्ने जवाफ आएको छ ।’
मन्त्री थापाले न्यूयोर्क हुँदै बेलायत पुगेका थिए । बेलायतमा रहँदा उनले विदेशमन्त्री जोन केरी र प्रधानमन्त्री डेभिड क्यामरुनको सल्लाहकारसँग भेटवार्ता गरेका थिए । उनले क्यामरुन र केरीलाई नेपाल भ्रमणको निम्तोसमेत दिएका छन् ।
केरीले सन् २०१६ को अन्त्यसम्म नेपाल भ्रमण गर्ने जवाफ दिएको र क्यामरुनले नेपाल भ्रमणबारे कुटनीतिक छलफल गरेर आवश्यक निर्णयमा पुग्ने जवाफ दिएको मन्त्री थापाले जानकारी दिए ।