२०७२ बैशाख १६ गते, बुधबार

काठमाडौं, १६ बैशाख । आज काठमाडौंबाट झन्डै डेढ लाख मानिस विभिन्न जिल्लातर्फ बाहिरिएका छन । मंगलबार बेलुका ६ बजेसम्म उपत्यकाका फर्पिङ, भक्तपुर र नागढुंगा नाकाबाट एक लाख ३२ हजार भन्दा बढी मानिस बाहिरिएको महानगरीय ट्राफिक प्रहरी महाशाखाका प्रमुख प्रहरी नायब महानिरीक्षक जयबहादुर चन्दले जानकारी दिए ।
बुधबारकालागि विभिन्न बस कम्पनीले सयौं बस व्यवस्था गरेकाले यो संख्या झण्डै दोब्बर हुने उनले उल्लेख गरे । सोमबार उपत्यकाबाट ८५ हजार ६ सय २९ जना बाहिरिएका थिए । महाशाखाका अनुसार सबैखाले सवारीसाधन गरी मंगलबार ६ हजार ८८ वटा सवारी साधन बाहिरिएका छन् ।
प्रहरी नायब महानिरीक्षक चन्दका अनुसार मंगलबारका लागि पश्चिमाञ्चल बस व्यवसायी संघले दुई सय भन्दा बढी बस, उच्च माध्यमिक विद्यालय हिसानले करिब पाँच सय वटा बसको व्यवस्था गरेका छन् ।
यसैबीच , काठमाडौँस्थित ठाडो भर्‍याङ क्षेत्रबाट हालसम्म ५५ जनाको जीवितै उद्धार गरिएको छ। सो स्थानबाट ४८ जनाको शव निकालिएको छ ।
यहाँको जीवनमार्ग बहुउद्देशीय सहकारी, म्याक्डोनाल्ड रेस्टुराँ, एक चर्च र अन्य दुई घरबाट गरी उक्त सङ्ख्यामा उद्धार गरिएको उद्धार टोलीले जनाएका छन् । ती भवनमा अझै १० जना हराइरहेको हुनसक्ने आशङ्का गरिएको छ । उक्त क्षेत्रमा नेपाली सेनाको नेतृत्वमा नेपाल प्रहरी, सशस्त्र प्रहरी, स्थानीयवासी, टर्कीस टोली र भारतीय टोली पनि उद्धारमा खटिएको छ।
यस क्षेत्रमा लगातार खटिएका मिलन टोल सुधार समितिका अध्यक्ष भीमसेन पोखरेलले शनिबारदेखि आजसम्म लगातार उद्धार कार्यलाई जारी राखिएको बताए । उनले ठूला भवन एकै स्थानमा रहेको र ठूलो सङ्ख्यामा मानिस भेला हुने सहकारी, चर्च र रेष्टुराँ एउटै लाइनमा रहेकाले पनि हताहत हुनेको सङ्ख्या बढी भएको बताए।