२०७४ माघ ९ गते, मंगलवार

काठमाडौं, ९ माघ । रुकुम पश्चिमको समशितोष्ण तरकारी वीउ उत्पादन केन्द्र चाँपा नेपालकै उत्कृष्ठ उत्पादन केन्द्रमा परेको छ । केन्द्रले ९० रोपनीमा लगाइएको तरकारी वीउवाली अहिलेसम्म उत्कृष्ठ हुँदै आइरहेको जिल्ला कृषि विकास कार्यालयले जनाएकोे छ । मूल वीउ तथा उन्नत वीउ उत्पादन हुने चाँपामा हाल काउली, मूला, रायो, केराउ, प्याज, गोलभेंडा, चम्सुर, धनियाँ, सलगमलगायतका विभिन्न तरकारी वीउबाली लगाइएको छ ।
तरकारी वीउ उत्पादनका लागि नेपालकै पकेट क्षत्र मानिएको चाँपाले गत आर्थिक वर्षमा मात्रै ४ मेट्रिक टन तरकारी वीउ उत्पादन गरेको थियो । ९० रोपनी जमिनमा विभिन्न जातका तरकारीको नर्सरी तयार गरी केन्द्रले मूल तथा उन्नत वीउ उत्पादन गरेर कृषकलाई सहुलियत मूल्यमा तरकारी वीउ बिक्री गर्दै आएको छ । केन्द्रले विभिन्न जातका १६ थरी तरकारीको मूल वीउ उत्पादन गरी बर्षेनी २० लाख रुपैयाँसम्म आम्दानी गर्दै आएको छ ।