२०७१ भाद्र ३१ गते, मंगलवार

काठमाडाै, ३१ भदाै । मैथिली र थारु समुदायका महिलाले आज जितिया पर्व मनाउदै छन । तराईका बिभिन्न ठाउँमा विशेष रुपमा मनाउने जितियाको मुख्य विधि भने सोमबारदेखि नै सुरु भएको छ ।तराईका महिलाले उपवास र प्राचीन प्रक्रिया अनुरुप पूजा गरेर यो पर्व मनाउने चलन रहेको छ । शाकाहारीले बिहानै नुहाएर गम्हरी अर्थात कोसाभित्रै फल्ने धानको खीर वा भात पनि खाने चलन छ । व्रतालुले नजिकको पोखरी, तलाउमा नुहाई भगवान् सूर्यलाई अर्घ अर्पण गर्छन् ।
त्यसपछि व्रतको सङ्कल्प गर्छन् र घरमा आएर डाली भर्ने गरिन्छ । दिउँसो टोलभरिका महिलाले एक ठाउँमा भेला भएर कथा वाचन गर्ने चलन छ । थारु समुदायमा विवाहित महिलाले आफ्ना सन्तति र पतिको सुखशान्तिको कामना गर्दै निराहार बसी तीन दिनसम्म यो पर्व मनाउने गर्छन् ।
जितिया पर्वलाई दसैँ आगमनको सङ्केतका रुपमा पनि लिइन्छ । कतिपय महिलाले यस पर्वमा पुर्खालाई समेत पूजा गर्ने गरेको पाइन्छ ।