२०७० असार २१ गते, शुक्रबार

काठमाडौं, असार २१ – माथिल्लो त्रिशूली ३ ए जलविद्युत् आयोजनाको ठेकेदार आफैंले काम ठप्प पारेका छन् । एमाओवादी, कांग्रेस, एमालेलगायत दलका कार्यकर्ता मिलेर २६ सूत्रीय माग राख्दै बन्द गरेको भोलिपल्ट चिनियाँ ठेकेदार कम्पनी गेजुवा आफैले आयोजनास्थलको काम ठप्प पारेको हो । रसुवाका तीन राजनीतिक दलले २० प्रतिशत सेयर प्रभावित जिल्लावासीलाई हुनुपर्ने, आयोजना १ सय ४५ मेगावाटको हुनुपर्ने, शिक्षा, स्वास्थ्य, रोजगारीलगायत २६ सूत्रीय माग राखेको भोलिपल्ट ठेकेदारले काम बन्द गरेको हो । आयोजनाको बाँधस्थल रसुवाको सल्लोटारको तल र माथिको सुरुङ, नुवाकोट मनकामना-९ सिम्लेमा पर्ने पावर हाउस निर्माणका लागि दुई वटा सुरुङको काम बन्द भएको छ । आयोजनास्थलमा गेजुवाका १ सय चिनियाँ र ५ सय नेपाली कामदार थिए ।
सरकारले क्षमता विस्तार नगरी ६० मेगावाटमै बनाउने निर्णय गरेपछि आयोजना स्थलमा एक सातादेखि राम्ररी काम हुन सकेको थिएन । आयोजनाले अहिलेसम्म १ किलोमिटर सुरुङ निर्माण गरिसकेको छ । आयोजनाले २२ प्रतिशत काम सम्पन्न गरेको जनाएको छ । आयोजना चीनको एक्जिम बैंकको १२ दशमलव ५ सय ७८ करोड अमेरिकी डलर (करिब १० अर्ब ६ करोड रुपैयाँ) ऋण सहयोगमा नेपाल विद्युत् प्राधिकरणले निर्माण गर्न लागेको आयोजना हो ।आयोजनाका लागि ऋणसम्बन्धी सम्झौतामा एक्जिम बैंक र नेपाल सरकारबीच ०६७ फागुन १६ मा ऋण सम्झौता भएको थियो । १ सय ४४ दशमलव ५ मिटर हेड रहने भूमिगत आयोजना ईपीसी मोडलमा निर्माण गर्न लागिएको हो । नदीको प्रवाहमा आधारित आयोजनाबाट उत्पादित विजुली राष्ट्रिय प्रसारण लाइनमा जोड्न आयोजनास्थलदेखि काठमाडौंको मातातीर्थ सवस्टेसनसम्म ४८ किलोमिटर २२० केभीए ट्रान्सिमिसन लाइन विस्तार गर्ने काम भइरहेको छ ।४ हजार ९५ मिटर लामो सुरुङमार्फत नदीको पानी पेनस्टेकमा पुर्‍याइने छ, त्यसलाई १८ हजार वर्गमिटर क्षेत्रफलमा निर्माण गरिने भूमिगत विद्युत् गृहका टर्वाइनमा पुर्‍याइने लक्ष्य थियो । सन् २०१४ को मेदेखि विद्युत् उत्पादन गर्ने लक्ष्य लिइएको सो आयोजना निर्माण अझै ढिलाइ हुने भएको छ ।