२०७१ आश्विन १३ गते, सोमबार

काठमाडौं , १३ असोज । नेपाल खाद्य संस्थानका प्रवक्ता नवराज उपाध्यायले काठमाडौंमा आइतबार साँझसम्म २ सय खसीबोका ल्याइसकिएको र अरु आउने क्रममा रहेको जानकारी दिएका छन् ।संस्थानले उपत्यकाबाहिरका जिल्लाबाट खरिद गरी काठमाण्डुमा ल्याएर जिउँदो २० किलोसम्म ४ सय ६, ३० किलोसम्म ४ सय १८ र सो भन्दा माथि ४ सय २५ मूल्य निर्धारण गरेको छ । थापाथलीस्थित संस्थानको गोदामबाट सोमबारदेखि बिक्री सुरु गरिने उनले बताए ।
संस्थानले विगतमा तराई तथा मध्य पहाडी जिल्लाबाट दसैँको समयमा खसीबोका खरिद गरी घटस्थापनाको ३/४ दिन अघिदेखि नै काठमाण्डु ल्याउने र मूल्य निर्धारण गरी घटस्थापनादेखि बिक्री गर्ने गरेकामा विभिन्न जिल्लामा खसीबोका खरिद गर्न नसकेका कारण यस वर्ष बिक्री ढिलो हुन गएको हो ।
संस्थानले यस वर्ष करिब तीन हजार सय खसीबोका ल्याउने भने पनि दसैँको समय नजिकिँदै गएकाले सो परिमाणमा आउने सम्भावना कम छ ।