अमेरिकाद्वारा ५० अर्ब सहयोग
२०७४ भाद्र ३० गते, शुक्रबार
काठमाण्डौ , ३० भदौ । अमेरिकी सरकारले नेपालको आर्थिक विकास र गरिबी निवारणका लागि सहयोग गरेको मिलेनियम कर्पोरेट च्यालेन्ज कम्प्याक्ट कार्यक्रमअन्तर्गत्को सहयोगसम्बन्धी सम्झौतामा बिहीबार वासिङटन डिसीमा हस्ताक्षर भएको छ । सम्झौतामा अमेरिकी सरकारको तर्फबाट एमसिसी च्यालेन्जका कार्यबाहक प्रमुख कार्यकारी अधिकृत जोनाथन नासा र नेपाल सरकारको तर्फबाट अर्थमन्त्री ज्ञानेन्द्रबहादुर कार्कीले हस्ताक्षर गरे । हस्ताक्षर कार्यक्रमलाई सम्बोधन गर्दे अमेरिकाका उपविदेशमन्त्री जोन जे सुलिभानले नेपालको आर्थिक विकासको माध्यमबाट न्यून आय भएका जनताको जीवनस्तर उकास्न अमेरिकी सरकारले सहयोग पुर्याउन पाएकोमा खुसी व्यक्त गरे । उनले भने–‘अमेरिका र नेपालबीच द्विपक्षीय सम्बन्धमा यसले मजबुत् सहकार्यको सन्देश दिन सफल भएको छ । साथै, यसले नेपालको आर्थिक वृद्धिमा र संस्थागत संरचनाको मजबुत् आधारशीला निर्माण गर्न सहयोग पुग्ने विश्वास लिएको छु ।’ कार्यक्रमलाई सम्बोधन गर्दै अर्थमन्त्री कार्कीले नेपाल अमेरिकाको सम्बन्ध स्थापना भएको ७० वर्ष पुगेको घडीमा यो सम्झौता एउटा कोशेढुंगा सावित भएको बताए । कार्कीले अगाडि भने–‘यो द्विपक्षीय सम्बन्धको ऐतिहासिक क्षण हो ।’ उनले नेपालको प्रजातान्त्रिक प्रक्रियामा विस्तारै संस्थागत विकास हुँदै गएको अवस्थामा यो सहयोगलाई पूर्णप्रतिबद्धताका साथ कार्यान्वयनमा लैजान सरकार कटिबद्ध रहेको बताए । साथै, अमेरिकी सरकारले नेपालको दिगो विकास र गरिबी निवारणमा गर्दै आएको सहयोगका लागि नेपाल सरकारका तर्फबाट हार्दिक धन्यवाद ज्ञापन गर्दै मन्त्री कार्कीले सामाजिक आर्थिक रुपान्तरणमा एमसिसी च्यालेन्जको सहयोग महत्वपूर्ण भएको बताए ।
कार्यक्रममा एमसिसीका कार्यबाहक प्रमुख कार्यकारी अधिकृत नासाले एमसिसी च्यालेन्जको माध्यमबाट विभिन्न क्षेत्रमा सहयोग गरिएको चर्चा गर्दै दक्षिण एसियाली देशमध्ये नेपालको गरिबी निवारणका लागि यो रकम सहयोग गरिएको बताए । उनले भने–‘मलाई विश्वास छ, यसलाई तोकिएको समयमा सम्पन्न गर्न नेपाल सरकारले महत्वपूर्ण भूमिका खेल्नेछ ।’
यो कार्यक्रमअन्तर्गत् अमेरिकी सरकारले नेपाललाई ५० करोड डलर बराबरको रकम सहयोगस्वरुप उपलब्ध गराउनेछ । जसमा नेपाल सरकारले १३ करोड डलर रकमको योगदान गर्नेछ । यसरी ६३ करोड डलर अर्थात् करिब ६३ अर्ब रुपैयाँ बराबरको यो आयोजना पाँच वर्षभित्र सम्पन्न गरिसक्नुपर्ने बाध्यात्मक व्यवस्था गरिएको छ । यसबाट २१३ किलोमिटर विद्युत् ट्रान्समिसन लाइनको निर्माण र सडक विस्तारमा खर्च गरिनेछ ।
डिसीस्थित स्टेट डिपार्टमेन्टको ट्रिटी हलमा आयोजित समारोहमा नेपालका लागि अमेरिकी राजदूत एलिना वी टेप्लिज, अमेरिकाका लागि नेपाली राजदूत डा. अर्जुनबहादुर कार्की, न्युयोर्कका लागि कन्सुलेट जनरल मधुकुमार मरासिनी, अर्थ मन्त्रालयका सहसचिव वैकुण्ठ अर्याल, स्टेट डिपार्टमेन्टका अधिकारी, जनसम्पर्क समिति अमेरिकाका सभापति आनन्द विष्ट, एनआरएन अमेरिकाका अध्यक्ष डा. केशव पौडेललगायतको उपस्थिति थियो ।- मधुकर अधिकारी (रासस)
