२०७६ फाल्गुन २७ गते, मंगलवार

काठमाडाैँ, २७ फागुन । ‘काठमाडौं भ्यूटावर’का ठेकेदार मनोजकुमार भेटवालले आत्मसमर्पण गरेका छन् । पुरानो बसपार्कमा बन्दै गरेको ३२ तले ‘काठमाडौं भ्यूटावर’काे ठेक्का लिएर निर्माण कार्यमा समेत ढिलाइ गरिरहेका भेटवाल बैंकिङ कसुरमा मुछिएपछि भारततिर फरार रहेका थिए । तेह्रथुम घर भएका भेटवालले भारतबाट फर्केर आज बिहान प्रहरी परिसर टेकुमा आत्मसमर्पण गरेकाे महानगरीय परिसरका प्रवक्ता डीएसपी होविन्द्र बोगटीले जानकारी दिए । भेटवालले दिएको ७५ लाख रुपैयाँको चेक बाउन्स भएपछि उनीविरुद्ध चन्द्र तामाङले बैंकिङ कसुरको केटानी जाहेरी प्रहरीमा दर्ता गराएका थिए ।
७ अर्ब ६४ करोड रुपैयाँको लागतमा टावर बनाइरहेका भेटवालले ७५ लाख रुपैयाँमा किन ठगी गरे भन्ने स्पष्ट हुन सकेको छैन । भेटवालविरुद्ध गत साउनमा राजस्व अनुसन्धान विभागले समेत अवैध हुण्डी कारोबारको मुद्दा दायर गरेको थियो । भेटवाल पटकपटक विवादमा पर्दै अाएका व्यक्ति हुन् । यसअघि रत्नपार्ककाे खुलामञ्चमा अवैध सटर बनाएर भाडामा लगाएका थिए । तर पछि जनस्तरबाट विराेध भएपछि काठमाडाैँ महानगरपालिकाकाे नेतृत्वमा ती भतकाइए ।
भेटवालकाे कम्पनी जलेश्वर स्वच्छन्द बिकोई प्रालि पछिल्लो समय आर्थिक संकटमा फसेपछि टावर निर्माण पनि अलपत्र परेको छ । टावर बनाउन स्वच्छन्द बिकोईले ल्याएको उपकरणको भाडा तिर्न नसकेपछि पछिल्लो समय साहु कम्पनीले ती उपकरण फिर्ता लगेको थियो । साहु कम्पनीले उपकरण लगेपछि भेटवाल भारततिर लागेका थिए । नेपाल आएको मौका पारेर प्रहरीले उनलाई पक्राउ गरेको बुझिएको छ । ०६८ असार २६ गते काठमाडौं महानगरपालिका नगरपरिषद्ले २३ रोपनी ५ आना जग्गामा सार्वजनिक निजी साझेदारी मोडलमा टावर निर्माण गर्ने निर्णय गरेको थियो । तर निर्माणले भने गति लिन सकेकाे छैन ।