चिनियाँ दूतावासमा ज्ञापन बुझाउन गएको टोली पक्राउ
२०७२ असार १० गते, बिहीबार
काठमाडौं, १० असार । दार्चुलाको लिपुलेकबाट व्यापारिक नाका विकास गर्ने भारत र चीनबीच भएको सहमति सच्याउन माग गर्दै काठमाडौंस्थित चिनियाँ दूतावासमा ज्ञापनपत्र बुझाउन गएकाहरुलाई प्रहरीले पक्राउ गरेको छ । ग्रेटर नेपाल राष्ट्रवादी मोर्चाको टोली ज्ञापनपत्रसहित चिनियाँ दूतावासनजिक पुगेपछि प्रहरीले पक्राउ गरेको हो ।
ग्रेटर नेपाल राष्ट्रवादी मोर्चाले नेपाली भूमि लिपुलेक भन्ज्याङलाई भारत र चीनले आफ्नो व्यापारिक स्वार्थका लागि प्रयोग गरेको भन्दै त्यसलाई सच्याउन माग गरेको छ । ग्रेटर नेपाल राष्ट्रवादी मोर्चाले चिनियाँ दूतावासपछि भारतीय दूतावासमा समेत ज्ञापनपत्र बुझाउने कार्यक्रम राखेको थियो । नेपालको भौगोलिक अखण्डतालाई खतरामा पारेर भारत–चीनबीच भएको सहमति पूर्णरुपमा हटाउनुपर्ने मोर्चाको माग छ । गत जेठ १ गते चीन र भारतबीच लिपुलेकलाई दुई देशको अन्तरसीमा व्यापारीक नाका बनाउने सम्झौता भएको थियो ।
