२०७० श्रावण ८ गते, मंगलवार

भारतको कास्मिरका बासिन्दा फेरोज अन दिन मिरले आफु १४१ वर्षको भएको दाबी गरेका छन् । यदि उनको दाबी सही ठहरियो भने उनी विश्वका सबैभन्दा वृद्ध मानिसको रुपमा गिनिज बुकमा नाम लेखाउन सफल हुनेछन् । अहिल विश्वमा सबैभन्दा जेठा व्यक्तिको रुपमा रहेका जापानका ११५ वर्षका मिसाओ ओकावा भन्दा उनी २६ वर्ष पाका हुनेछन् ।मिरले हावादारी दाबी गरेका पनि होइनन् । उनको नागरिकतामा बकाइदा उनको जन्ममिति १८७२ साल मार्च १० तारेख लेखिएको छ ।मिरको यस्तो दाबीपछि गिनिज वल्र्ड रेकर्डस् प्रतिनिधिले यस विषयमा गम्भीर अध्ययन थालेको बताइएको छ । यदि मिरको उमेर १४१ वर्ष नै ठहरियो भने उनी विश्वमा मानव इतिहासमा अहिलेसम्म धेरै वर्षसम्म बाँचेका व्यक्तिको रुपमा समेत गिनिज बुकमा दर्ज हुनेछन् । स्मरण रहोस् विश्वमा अहिलेसम्म धेरै वर्षसम्म बाँच्ने व्यक्ति फ्रान्सका जियन क्लेमेन हुन् । सन् १९९७ मा मृत्यु हुँदा उनको उमेर १२२ वर्ष थियो।
समाचार अनुसार मिर अहिले पनि परिवारको सहायताले हिँडडुल गर्न सक्छन् भने धमिलै भएपनि आँखाले देख्न सक्छन् । उनी आफ्नो मातृभाषा पहारीमा कुराकानी समेत गर्न सक्छन् । मिरले सन् १८९० को दशकमा पहिलो विवाह गरेका थिए । उनकी जेठी श्रीमतीको सन् १९०० मा निधन भयो । उनी त्यतिबेला फलफूल व्यापारी थिए । उनी कास्मिर र कराँची ओहोरदोहोर गरिरहन्थे । उनले जेठी श्रीमतीको निधन भएपछि दोश्रो विवाह गरे । उनको विवाह यात्रा यत्तिमै थामिएन । त्यसपछि पनि उनले लगातार तेश्रो, चौथो र पाँचौ विवाह गरे । उनकी पाँचौ श्रीमतीको नाम मिसरा हो ।मिसराका अनुसार उनका श्रीमान मिरले सन् १८८० ताकाको भुइँचालोका बारेमा आफुलाई उनका अनुभव सुनाउने गरेको बताउँछिन् ।गएको सताब्दीका धेरै महत्वपूर्ण कुरा देख्ने उनी एकमात्र व्यक्ति रहेको दाबी मिसराको छ । आधुनिकता सँगै जिवन जटिल बन्दै गएको अनुभव छ १४१ वर्षका मिरको । मिरका नाती अब्दुल रशिदका अनुसार १० वर्षअघि हजुरबुवा मिरको आँखाको अपरेशन भए यता स्वास्थ्य तथा स्मरण शक्तिमा पनि ह्रास आएको छ । – एजेन्सी