२०७२ श्रावण २८ गते, बिहीबार

काठमाडौं, २८ साउन ।संघीय लिम्वुवान पार्टी नेपालले सरकारसँग भएका पटक–पटकका सहमति कार्यान्वयन नगरी पहिचानविनाका प्रदेश निर्माण गरिएको भन्दै आज पूर्वका नौ जिल्ला बन्द आह्वान गरेको छ । पूर्वी नेपालको अरुण सप्तकोशी पूर्वका नौ जिल्लासहितको लिम्बुवान राज्य माग गर्दै संघीय लिम्बुवान पार्टी नेपालले बन्द आह्वान गरेको हो । बन्दका कारण सुनसरी, मोरङ, झापा, इलाम, पाँचथर, ताप्लेजुङ, संखुवासभा, ते¥हथुम र धनकुटा जिल्लाको जनजिवन प्रभावित बनेको छ ।
बन्दका कारण यी जिल्लामा शैक्षिकसंस्था, बजार, कलकारखाना र यातायात ठप्प बनेका छन् । लिम्बुवान कार्यकर्ताले विहानैदेखि सडकमा निस्किएर प्रदर्शन शुरु गरेका छन् । बन्दका कारण पूर्वका धरान, इटहरी, विर्तामोड, दमक, काकडभिट्टा लगायतका मुख्य बजारहरु पूर्णरुपमा बन्द भएका छन् ।
लिम्बुवान राज्य माग गरिरहेको अबस्थामा सत्तारुढ दलहरु कांग्रेस, एमाले प्रतिपक्षमा रहेको एमाओवादी र मधेसी जनअधिकार फोरम लोकतान्त्रिकका प्रमुख नेताहरुको सहमतिमा थप ५ जिल्ला थप गरेर १ नम्बर प्रदेशको अवधारण ल्याउनु स्वागत योग्य भए पनि प्रदेशको नामांकन गर्दा लिम्बुवान राज्य घोषणा गराउनका लागि दवाद दिने उद्देश्यले लिम्बुवान बन्दको घोषणा गरिएको लिम्बुवान पार्टीले जनाएको छ ।
यसैगरी, छुट्टै थरुहट प्रदेशको माग राखेर थरुहट तथा थारुवान संघर्ष समितिले आह्वान गरेको बन्दको कारण आज दोस्रो दिन पनि तराईका २२ जिल्ला ठप्प बनेका छन् । बन्दका कारण थारुहरुको वाहुल्यता रहेका दाङ, बाँके, बर्दिया, कैलाली, कञ्चनपुरसहित कपिलबस्तु, रुपन्देही र नवलपरासीसम्मको जनजीवन प्रभावित बनेको हो ।ती जिल्लामा उद्योग, कलकारखाना, शिक्षण संस्थाहरु सञ्चालन हुन सकेका छैनन् भने यातायात पनि न्युन मात्रामा चलेका छन् ।
बन्दकर्ताहरुले ठाउँठाउँमा प्रदर्शन जारी राखेका छन् । थारुहरुको पहिचान कायम राख्न माग गर्दै आह्वान गरिएको बन्द साउन ३२ गतेसम्म जारी रहने संघर्ष समितिले जनाएको छ ।
उता, आठ दिनदेखिको बन्दका कारण सुदूर पश्चिमको जनजीवन थप कष्टकर बनेको छ ।
कैलाली–कञ्चनपुरलाई थारुवान राज्य बनाउनुपर्ने माग गर्दै थारु कल्याणकारी सभाले सात दिन यता बन्द गराउँदै आएको छ भने त्यसअघि अखण्ड सुदूरपश्चिम पक्षधरले बन्द गराएका थिए ।
आठ दिनदेखिको बन्दका कारण सर्वसाधारणको दैनिकी चौपट बनेको छ भने भारतबाट नेपाल फर्कने यात्रु र मजदूरहरुको बिचल्ली भएको छ ।
बन्दका कारण सुदूरपश्चिमका पहाडी जिल्लाहरुमा खाना पकाउने ग्यास, पेट्रोल र खाद्यान्न अभाव हुन थालेको छ । यता, अखण्ड राप्तीको माग गर्दै रुकुम र सल्यानमा पनि मंगलबारदेखि गरिएको बन्द कायमै छ ।