२०७१ श्रावण २० गते, मंगलवार

काठमाडौं। विश्व बैंकले पश्चिमी अफ्रिकी मुलुकमा फैलिएको इबोला भाइरसको महामारी नियन्त्रणका लागि २० करोड डलरको आकस्मिक सहयोगको घोषणा गरेको छ ।यो रकम अल्पकालिन र दीर्घकालिन रुपमा महामारीको नियन्त्रण र निवारणमा खर्च गर्ने गरी विश्व स्वास्थ्य संगठन तथा लाइबेरिया, सियरालिओन र गिनीका सरकारलाई प्रदान गरिनेछ । अल्पकालिन योजना अन्तर्गत स्वास्थ्यकर्मीलाई प्रदान गर्न, स्थानीय समुदायमा रोगका बारेमा फैलिएको हल्ला हटाउन र बिरामी परेकाहरुको तात्कालिन आवश्यकता पूरा गर्न प्रयोग गरिने बिबिसीले जनाएको छ ।
यस्तै दीर्घकालिन रुपमा इबोला भाइरसको विस्तारको निगरानी राख्न र महामारीका कारण प्रभावित देशमा परेको आर्थिक प्रभाव हटाउनका लागि खर्च गरिनेछ । विश्व बैंकका अध्यक्ष जिम योङ किमले इबोला भाइरसको बढ्दो महामारी र तीन देशमा यसअघि नै कमजोर रहेको स्वास्थ्य सेवालाई महामारीले पारेको गम्भीर प्रभावप्रति आफू चिन्तित रहेको बताउनुभयो । महामारी फैलिनबाट तत्काल रोक्न नसके यसले अझै धेरै जीवन जोखिममा पर्ने भन्दै उहाँले चिन्ता व्यक्त गर्नुभएको छ ।
यसैबीच अफ्रिकी मुलुक नाइजेरियामा इबोलाको दोश्रो बिरामी फेला परेका छन् । लाइबेरियाबाट फर्किएका एक जना बिरामीको उपचार गरिरहेका डाक्टरमा इबोला भाइरस भेटिएको हो । संयुक्त राष्ट्रसंघका अनुसार इबोला भाइरसका कारण ज्यान गुमाएकामध्ये ६० जना भन्दा बढी स्वास्थ्यकर्मी रहेका छन् ।