२०७३ भाद्र ३ गते, शुक्रबार

काठमाडौं, ३ भदौ । सुख्खा पहिरोका कारण धादिङको दार्खा गाविस–८ का २५ परिवार विस्थापित भएका छन् । गत आइतबारदेखि बस्तीमाथिबाट पहिरो खसेपछि दार्खाका २५ धरधुरीका ९९ जना विस्थापित भएको धादिङ प्रहरीले जनाएको छ । पहिरोको जोखिममा रहेका स्थानीयलाई दार्खा प्रहरीले उद्धार गरेर नजिकैको सुरक्षित स्थानमा राखेको छ । विस्थापित भएकाहरुलाई अस्थायी टहरा बनाएर राख्ने विषयमा स्थानीय राजनीतिक दल, संघसंस्था, स्थानीयहरुबीच छलफल भइरहेको छ ।
पहिरोबाट विस्थापितमध्ये ५ घरधुरीका २२ जनालाई दार्खा–८ सल्लेरीमा ५ वटा त्रिपालको टहरा बनाइ राखिने बताइएको छ । त्यस्तै १६ जनालाई भोक्टेनी प्राविमा र ६१ जनालाई लङचेतका स्थानीय बासिन्दाको घरमा बस्ने व्यवस्था मिलाइएको छ । विस्तापितहरुलाई तत्काल राहत सामाग्री उपलब्ध गराउने दैवी प्रकोप उद्धार समिति धादिङले जनाएको छ ।