२०७२ भाद्र १३ गते, आईतवार

काठमाडौं , १३ भदौ । गोसाइँकुण्ड जलयात्रा सुरु भएको छ । ‘सबै जातजाति, भाषाभाषीको सद्भाव र एकता अटल रहोस्’ भन्ने कामनासहित सो जलयात्रा सुरु भएको हो । देशमा दिगो शान्तिको कामना गर्दै २०६३ सालमा साइकल यात्रा सुरु गरेका पर्सा जिल्ला ठोरी गाविस–७ निवासी ४० वर्षीय बुद्धिबहादुर गुरुङले पछिल्लो चरणमा जलयात्रा सुरु गरेका हुन् । जनैपूर्णिमाको अवसरमा पारेर गोसाइँकुण्ड पुगी ल्याएको जल पशुपतिनाथलगायत देशका सबै मठमन्दिरमा चढाई देशमा दिगो शान्तिको कामना गर्ने आफ्नो उद्देश्य रहेको गुरुङले बताए । नीतिनिर्माण गर्ने तहमा आसीन सबै तह र तप्काका महानुभावलाई समेत जलको अभिषेक गराउने उनको योजना छ । जलयात्री गुरङले आज बिहानदेखि धुन्चेबाट सो जलयात्रा सुरुआत गर्नुभएको हो
यसैबीच जनैपूर्णिमाका अवसरमा गोसाइँकुण्ड पुगेका तीर्थयात्री धमाधम फर्कने क्रम सुरु भएको छ । कुण्ड पुगेका यात्रुलाई कुनै पनि समस्या नआएको र सहज रुपले यात्रा भएको गोसाइँकुण्ड क्षेत्र विकास समितिले जनाएको छ ।