२०७४ माघ १० गते, बुधबार

काठमाडौं, १० माघ। भारत, विहारका पूर्वमुख्यमन्त्री लालुप्रसाद यादवलाई पशुपक्षीको दाना घोटालासम्बन्धी अर्को मुद्दामा पाँच वर्षको जेल सजाय सुनाइएको छ । बुधबार राँचीस्थित सीबीआइको विशेष अदालतले ‘चाइबासा कोषागार’सँग जोडिएको ३३ करोड ६७ लाखभन्दा बढी भारतीय रुपैयाँको नक्कली बिल बनाएर रकम निकासा दिएको मुद्दामा लालुविरुद्ध यो सजाय सुनाएको हो । यो घोटाला २१ वर्ष पुराना हो ।
राष्ट्रिय जनता दलका अध्यक्ष रहेका लालुसँगै उक्त कान्डमा जोडिएका पूर्वमुख्यमन्त्री जगन्नाथ मिश्रलाई पनि पाँच वर्षको जेल सजाय सुनाइएको छ । गत जनवरी १० मा मुद्दाको सुनुवाइ सकिएको थियो । सीबीआइले ७६ जनाविरुद्ध मुद्दा दर्ता गरेपनि सुनुवाइकैक्रममा १४ जनाको मृत्यु भइसकेको छ ।
यसअघि, जनवरी ६ मा चारा घोटालाकान्डमा दोषी पाइएपछि लालुलाई साढे तीन वर्षको जेल सजाय सुनाइएको थियो । यस मुद्दामा दोषी पाइएका लालुलाई हाल बिरसा मुन्डा केन्द्रीय कारागारमा राखिएको छ । – एजेन्सी