२०७३ श्रावण ४ गते, मंगलवार

काठमाडों,४ साउन । यातायात व्यवस्था विभागले सवारी लाइसेन्स शुल्क बढाएको छ । विभागले यहि साउन १ गतेदेखि लागू हुनेगरी सवारीचालक अनुमतिपत्र (लाइसेन्स)को आवेदन दस्तुर, नयाँ लाइसेन्स, नवीकरण र प्रतिलिपी शुल्कमा दोब्बर बढीले बृद्धि गरेको छ । विभागले लाइसेन्स लिन लिखित परीक्षाको फारम शुल्क २ सय रुपैयाँबाट बढाएर ५ सय रुपैयाँ बनाएको छ ।
यस्तै दुईपांग्रे सवारी–साधनको लाइसेन्स लिँदा र नवीकरण गर्दा लाग्ने शूल्क १५ सय रुपैयाँ पुर्‍याएको छ । यसअघि, ७ सय रुपैयाँ थियो ।
विभागले कार, जिप, डेलिभरी भ्यानको शतप्रतिशत बढाएर २ हजार रुपैयाँ पुर्‍याएको छ । मिनीबस, मिनीट्रकको १५ सय रुपैयाँबाट बढाएर २५ सय र ठूला सवारी–साधनको लाइसेन्स लिँदा ३ हजार रुपैया तिर्नुपर्ने भएको छ ।
त्यस्तै, प्रतिलिपी लाइसेन्स लिँदा लाग्ने १ सय रुपैयाँबाट बढाएर ५ सय रुपैयाँ बनाइएको छ । विभागका प्रवक्ता वसन्त अधिकारीले गैरकर राजश्व बढेकाले यातायात विभागबाट प्रवाह हुने सबै सेवा शूल्य साउन १ गतेदेखि बढाइएको बताए ।