२०७३ जेष्ठ १६ गते, आईतवार

काठमाडौँ, १६ जेठ । भारत र पाकिस्तानबीच परमाणु हतियार विकसित गर्ने होड चलिरहेको समयमा एक पाकिस्तानी वैज्ञानिकको अभिव्यक्तिले भारत झस्किएको छ । पाकिस्तानी परमाणु वैज्ञानिक डा. अब्दुल कादिर खानका अनुसार पाकिस्तानले सन् १९८४ मै परमाणु परीक्षणको सामथ्र्य राखिसकेको थियो, जसले केवल पाँच मिनेटमा भारतको राजधानी दिल्लीलाई ध्वस्त बनाउन सक्थ्यो । तर तत्कालिन सरकारले अनुमति नदिएका कारण उक्त परीक्षण स्थगित भएको उनले बताए । पाकिस्तान परमाणु शक्ति बनेको अवसरमा आयोजित एक सभालाई सम्बोधन गर्दै डा. खानले शनिबार साँझ भने, ‘रावलपिन्डीको कहुटा न्यूक्लियर सेन्टरबाट भारतको राजधानी दिल्लीलाई पाँच मिनेटमै निशाना बनाउन सकिने परमाणु शक्तिको परीक्षण त्यतिबेला पाकिस्तान सरकारको आग्रहमा रोकिएको हो ।’ उनले भने, ‘तत्कालिन राष्ट्रपति जनरल जिया उल हकले उक्त कार्यक्रम स्थगित गर्न आदेश दिए, पाकिस्तानले त्यस्तो परीक्षण गरेमा पाकिस्तानलाई दिइने विदेशी सहयोग रकम बन्द हुने भन्दै उनले यसको अनुमति दिएनन् ।’
डा. खानका अनुसार जनरल जियाको त्यो भनाईमा सत्यता पनि थियो । उनले भने, ‘त्यतिबेला सोभियत सेना अफगानिस्तानमा युद्ध गरिरहेको थियो र पाकिस्तानलाई अमेरिकी मद्दतका माध्यममा निकै ठूलो रकम प्राप्त भइरहेको थियो ।’ उनले पाकिस्तान परमाणु शक्ति सम्पन्न राष्ट्र हुनुमा आफ्नो महत्वपूर्ण भूमिका रहेको पनि प्रष्ट पारे । उल्लेखनीय छ, खानलाई पाकिस्तानको परमाणु कार्यक्रमको जनक मानिन्छ । तर सन् २००४ मा पाकिस्तान सरकारले उनलाई नजरबन्दमा राखेको थियो । उनले उत्तर कोरिया, इरान र लिबियालाई न्यूक्लियर टेक्नोलोजी बेचेको आरोप लागेको थियो । खानलाई सन् २००९ मा पाकिस्तान सरकारले रिहा गरेको हो । – एजेन्सी