२०७२ आश्विन २७ गते, बुधबार

काठमाडौ, २७ असोज । सरकारले आजदेखि दशैंका लागि काठमाडौ उपत्यकामा भित्रिने खसीबोकालगायतका चौपायाको अनुगमन गर्दै स्वास्थ्य परीक्षण गर्ने भएको छ । राजधानीमा न्यून मात्रामा इन्धन आपूर्ति भएलगत्तै उपत्यकाको विभिन्न नाकाबाट दशैंका लागि खसीबोका भित्रिने क्रम शुरु भएपछि आजदेखि सबै चौपायाको अनुगमन गर्न लागिएको हो । थानकोट, कोटेश्वर, फर्पिङलगायतका नाकाबाट भित्रिने चौपायाहरुको स्वास्थ्य परीक्षण गरी खान योग्य भए वा नभएको अवस्थाबारे जानकारी गराइने भएको छ ।
त्यसका लागि भेटेनरी जनस्वास्थ्य कार्यालय, काठमाडौं महानगरपालिका, पशु चिकित्सक र चौपाया ब्यवसायीको संयुक्त टोली खटिने महानगरपालिकाको शहरी जनस्वास्थ्य महाशाखा प्रमुख हरीकुमार श्रेष्ठले बताए । टोलीले अनुगमन गरी अस्वस्थ चौपाया भए बेचबिखनमा रोक लगाउनेछ ।