नेपाल कम्युनिस्ट पार्टी र नेकपा माओवादी समाजवादीले गत चैत १ गते काठमाडौँमा संयुक्त पत्रकार सम्मेलन गरेर आगामी बैशाख ९ गते अर्थात नेपाल कम्युनिस्ट पार्टी स्थापना दिवसको अवसर पारेर पार्टी एकता गर्ने घोषणा गरेका छन् । पछिल्लो समय दश बर्षे जनयुद्धको उपलब्धिलाई नामेट पार्ने देशीविदेशी प्रतिक्रियावादी शक्तिहरुको षड्यन्त्रलाई निस्तेज पार्न र देशमा वैज्ञानिक समाजवाद स्थापना गर्न बिगतदेखि नै संघर्ष गर्दै आएको नेपाल कम्युनिस्ट पार्टीको पहलमा नेपालका तमाम क्रान्तिकारी कम्युनिस्ट, प्रगतिशील र सच्चा लोकतन्त्रवादीहरुलाई समट्ने जुनकार्यको सुरुवात भएको छ । यो आफैँमा स्वागतयोग्य र प्रशंसनिय कार्य हो ।

यतिबेला संसदीय व्यवस्थाका कारण राष्ट्रिय स्वाधिनतामाथि संकट आइपरेको छ, जनजीविका दिनप्रतिदिन चौपट हुँदै गएको छ । देशको राजनीतिक, आर्थिक, सामाजिक र सांस्कृतिकलगायत सबै क्षेत्रमा दलालहरुको हालिमुहाली छ । सरकारका तीनवटै अंग व्यवस्थापिका, कार्यपालिका र न्यायपालिका अस्तव्यस्त र बेलगाम भएका छन् । जताततै भद्रगोलको स्थिति छ । यो सबै हुनुको कारक भनेको ससदीय व्यवथा नै हो भन्ने आम सर्वसाधारण नागरिकले बुझ्ने गरी पुष्टि भएको छ । देशको यस्तो बिग्रदो स्थितिलाई सही मार्गमा ल्याउन नेपाल कम्युनिस्ट पार्टीले सुरु गरेको एकता अभियानलाई देशका तमाम क्रान्तिकारी, प्रगतिशील र सच्चा लोकतन्त्रवादी राजनीतिक दल, नेता र आम स्वाभिमानी जनताले साथ र सहयोग गर्दै सफल पार्ने पार्छ । अन्यथा देश देशी–बिदेशी दलालहरुको खेल मैदान बन्ने निश्चित छ । तसर्थ, देश जनताको लागि नेपाल कम्युनिस्ट पार्टीको पहलमा सुरु भएको एकता अभियानलाई पूर्णता दिँदै स्वाधीन राष्ट्र र सार्वभौम नेपाली बन्नबाट नचुकौँ । आजको आवश्यकता, समयको माग र आमनेपालीको चाहना पनि यही छ ।