नारायणगोपाल स्मृति सम्मान तारादेवी र गणेश रसिकलाई

२०८० मंसिर २० गते, बुधबार


काठमाडौँ । नारायणगोपाल संगीत कोषले यस वर्षको ‘नारायणगोपाल स्मृति सम्मान’ गायिका तथा संगीतकार तारादेवी र वाङ्मयसेवी गणेश रसिकलाई प्रदान गरेको छ। स्वरसम्राट नारायण गोपाल गुरुवाचार्यको ३३ औँ स्मृति दिवसका अवसरमा स्वर किन्नरी तारादेवी (मरणोप्रान्त) र संगीतकार गणेश रसिक (राई)लाई सम्मान गरिएको हो ।
नारायणगोपाल सङ्गीत कोष र सांस्कृतिक संस्थानद्वारा आयोजित कार्यक्रममा कोषका अध्यक्ष उषा शेरचनले उनीहरुलाई नारायणगोपाल स्मृति सम्मान एवं विशेष पुरस्कार प्रदान गरिन्। पुरस्कारको राशि जनही रु ५१ हजार रहेको छ।
दिवंगत तारादेवीलाई प्रदान गरिएको सम्मान तथा पुरस्कार तारादेवी स्मृति प्रतिष्ठानका उपाध्यक्ष भूवन चन्दले ग्रहण गरिन्। अग्रज स्रष्टा तारादेवीले तीन हजार पाँच सय बढी गीतमा स्वर दिएकी छिन्। सो अवसरमा सम्मानित व्यक्तित्व रसिकले स्वरसम्राट नारायणगोपालसँगको सहकार्यका अनुभूति सुनाउँदै उनको गीत संगीतबिना सुगम संगीत अपुरो हुने बताए।
विसं २०४७ मा स्थापित कोषले यसअघि ४० स्रष्टालाई सम्मान गरिसकेको छ । कार्यक्रममा विभिन्न कलाकारले नारायणगोपालले गाएका विभिन्न गीत प्रस्तुत गरेका थिए।

प्रतिक्रियाहरु