२०७८ कार्तिक २ गते, मंगलवार

काठमाडौ । रानीमहल घुम्न गएका पर्यटक अलपत्र परेका छन् । पाल्पामा दुई दिनदेखि परेको अविरल वर्षापछि आएको पहिरोका कारण रानीमहल घुम्न जाने र घुमेर फर्कने पर्यटक अलपत्र परेका हुन् । निरन्तरको वर्षाका कारण तानसेन रानीमहल सडकखण्ड २४ घन्टादेखि अवरुद्ध छ । स्थानीय बसन्त कुवरका अनुसार रानीमहल सडक खण्डको आधा दर्जन बढी स्थानमा पहिरो गएको छ । गाईघाट, बैकुण्ठे भिर, हात्ति ढुङगालगायतका ठाउँमा पहिरो गएको हो ।
तानसेन नगरपालिकाका मेयर अशोक कुमार शाहीले डोजर पठाएर पहिरो हटाउने तयारी भएको बताए । एक दुई घन्टाभित्र पहिरो हटाउन सकिने उनले बताए । प्रेमको प्रतिक रानीमहल घुम्न दसैँलगत्तै पाल्पासहित छिमेकी जिल्लाहरुः गुल्मी, स्याङजा, पर्वत, बाग्लुङ, काठमाडौं, पोखरा, बुटवल, कपिलवस्तुबाट पर्यटक जान्छन् ।