भारतीय सीमा सुरक्षा बल (एसएसबी) ले तुइन काटेर दार्चुलास्थित व्यास गाउँपालिका मालघाटका ३५ वर्षीय जयसिंह धामीलाई बेपत्ता बनाएको झण्डै १० दिन नाघिसक्यो तर सरकारले यस विषयमा खासै ध्यान दिएको देखिँदैन । सरकारले उक्त घटनाको छानबिन गर्न गृह मन्त्रालयका सहसचिव जनार्दन गौतमको नेतृत्वमा एक छानबिन समिति बनाएर उक्त घटनालाई त्यतिकै ढाकछोप गर्न लागेको भन्दै चौतर्फी विरोध भइरहेको छ । उक्त छानबिन टोलीको कार्यशैली हेर्दा पनि उक्त घटनालाई फितलो बनाउँदै त्यतिकै सामसुम पार्ने नियत देखिन्छ । जसको पुष्टि छानबिन समितिले अहिले उक्त घटनाको सम्बन्धमा स्थानीय जनता र घटनास्थल नजिकको नेपाली सुरक्षा निकायसँग घटनाको सत्यतथ्य नबुझी भारतीय सुरक्षा निकायसँगको सहयोगमा भारततर्फबाट घटनाको निरीक्षण गर्नुले पनि गर्दछ । त्यसकारण देश र जनतामाथि एसएसपीको यो ज्यादितलाई छानबिन समितिको प्रतिवेदनको नाममा फितलो बनाउँदै ढाकछोप गर्ने कार्य गरे त्यो आमनेपाली जनताको लागि कुनै हालतमा स्वीकार्य हुन सक्दैन । तसर्थ, उक्त घटनाको सत्यतथ्य छानबिन गरी दोषीउपर कानुनबमोजिम कडाभन्दा कडा कारवाही गर्नुपर्छ र भारत सरकार, भारतीय सीमा सुरक्षा बलले समेत आगामी दिनमा यस्तो ज्यादित नदोहो¥याउने लिखितरुपमा प्रतिबद्धता जनाउनुपर्छ । अन्यथा भारतको मिचाहा प्रवृत्ति र भारतीय सीमा सुरक्षा बलको ज्यादित र छानबिनको नाममा घटनालाई ढाकछोप गर्ने नेपालको सरकारको कार्यशैलीविरुद्ध आमस्वाभिमानी जनता सडकमा उत्रने छन् र राष्ट्रिय मुक्तिको आन्दोलन छेड्ने छन् । जसबाट भारतीय शासक, एसएसबीको ज्यादति र देश–जनताको रक्षा गर्न नसक्ने नेपाल सरकार दुवैको अस्तित्व मेटिने निश्चित छ, चेतना भया ।