इतिहासको सुरुदेखि

ऐलेसम्म सडकमै छौं

जिन्दगीले जानेदेखि

आजसम्म सडकमै छौं

तिमी त के छौ सडकमा

हामी पो त सडकमा छौं !

माथि के–के पर्छ अनि

तिमी पनि आउने गर्छौ

जिन्दावाद र मूर्दावादका

नाराहरू लाउने गर्छौ

हामीसँग हिँड्नु पर्दा

भित्रभित्रै डराउँछौ

माथि फेरि के–के मिल्छ

रातारात हराउँछौ !

हिजोसम्म कालो सिसा

लगाएर गुड्थ्यौँ तिमी

सडकसँग डराएर

आकाशमा उड्थ्यौँ तिमी

भात भान्सा खोसियो कि

सडकमा फेरि आयौ

देश फेर्न आँट्या हो कि

एक्लो जीवन फेर्न चाह्यौ ?

ब्यवस्थामै संकट छ

तिमी भन्छौ मान्छे फेरौं

अर्को भन्छ ऐले पर्खौं

अदालतले क्यार्छ हेरौं

देखिसक्यो जगतले

दह्रा लुला खुट्टी तिम्रा

सुनिसक्यौं पटक पटक

बासी फाइँफुट्टी तिम्रा !

ए सडकका पाहुना हो

कहाँसम्म जान्छौ तिमी ?

तिम्ले भन्या प्रतिगमन

कैलेदेखि मान्छौ तिमी ?

हामीलाई त प्रतिगमन

हिजो पनि आज पनि

तिम्रा कुरा सुन्दाखेरि

लजाउँछ लाज पनि !