रणनैतिक संयुक्त मोर्चा सार्थक बनोस्
नेपाल कम्युनिस्ट पार्टीको पहलमा देश र जनतालाई वर्तमान संकटबाट पार लगाउन रणनैतिक संयुक्त मोर्चा निर्माण भएको छ, जुन देश र जनताको लागि ज्यादै खुसीको कुरा हो । विगतदेखि नै संसदीय व्यवस्थाबाट देश र जनताको मुक्ति सम्भव छैन भन्दै सम्पूर्ण निकायका निर्वाचन बहिष्कार गर्दै आएको नेपाल कम्युनिस्ट पार्टीले अगाडि सारेको राजनीतिक एजेण्डा यतिबेला सही सावित भएको छ । देश र जनतालाई वर्तमान संकटबाट पार लगाउन अब एकीकृत जनक्रान्तिमार्फत् वैज्ञानिक समाजवाद स्थापना गर्नुको कुनै विकल्प छैन । नेकपाको यस महान् अभियानमा तमाम क्रान्तिकारी दल, नेता, शक्ति र सचेत नागरिकले साथ र सहयोग गर्नु निर्विकल्प बन्दै गएको छ । त्यसै कारण देशमा रहेका क्रान्तिकारी दल र नेताहरु गोलबद्ध हुन थालेका छन्, जसको थालनीस्वरुप रणनैतिक संयुक्त मोचा निर्माण भएको छ । उक्त रणनैतिक संयुक्त मोर्चाको उद्देश्य दलाल तथा प्रतिक्रियावादी संसदीय व्यवस्था र राज्यसत्ताको अन्त्य गरी वैज्ञानिक समाजवादी व्यवस्था स्थापना गर्नु रहेको जनाइएको छ भने मोर्चाले उद्देश्य प्राप्त गर्ने ध्येय पूरा गर्न तत्कालका लागि देश एवं जनताका समस्याहरु समाधान गर्न राष्ट्रियता, जनतन्त्र र जनजीविकाका मुद्दाहरुमा निरन्तर जनपरिचालन र संघर्ष गर्नुपर्ने बताउँदै कार्यगत एकतामा आधारित गठबन्धनहरु, विभिन्न जनवर्गका न्यायपूर्ण संघर्ष एवं सन्दर्भहरुलाई समेत नीतिगत तथा व्यवहारिक नेतृत्व दिन निरन्तर लागिपर्ने जनाएको छ । जुन ज्यादै महत्वपूर्ण विषय हो । यसर्थ, देश र जनतालाई वर्तमान संकटबाट पार लगाउन र संसदीय व्यवस्थाको चंगुलबाट मुक्त पार्न रणनैतिक संयुक्त मोर्चाले उद्घोष गरेको आन्दोलनलाई साथ र सहयोग गर्नु अपरिहार्य भएको छ । अन्यथा संसद्वादी दलहरुले देश र जनतालाई भड्खालोमा हाल्ने निश्चित छ ।
तसर्थ, आमसचेत नागरिक नेपाल कम्युनिस्ट पार्टीको पहलमा बनेको रणनैतिक संयुक्त मोर्चालाई सार्थक बनाउन कटिबद्ध र प्रतिबद्ध हुनुको विकल्प छैन । किनकि संसदीय व्यवस्था विघटन गरेर वैज्ञानिक समाजवाद स्थापना नगरेसम्म देश र जनताको मुक्ति सम्भव छैन । फेरि पनि झण्डै दुई तिहाई बहुमत प्राप्त गरेर देश र जनहितको पक्षमा सिन्कोसमेत भाँच्न नसक्ने संसदीय व्यवस्थाको गोलचक्करमा फस्ने हो भने देश र जनताको भविष्य चौपट हुने निश्चित छ । संसद् पुनस्र्थापना वा निर्वाचनले वर्तमान संकटको समाधान हुनै सक्दैन । त्यसले त झन् राष्ट्र र जनतामाथि ठूलो घात गर्ने निश्चित छ । तसर्थ, आमक्रान्तिकारी दल, नेता, शक्ति र सचेत नागरिकहरु रणनैतिक संयुक्त मोर्चामा सामेल हुनैपर्छ । देशमा त्यही मोर्चाको बलबाट मात्र संसदीय व्यवस्थाको जरो उखेलेर देशमा वैज्ञानिक समाजवाद स्थापना गर्न सम्भव छ । अन्यथा, देश र जनताको भविष्य अन्धकार हुनेछ, चेतना भया ।