२०७० फाल्गुन २१ गते, बुधबार

काठमाडौं, २१ फागुन। इकोनोमिस्ट इन्टेलिजेन्स युनिट (ईआईयू) ले विश्वभरका मानिसहरुको जीविकोपार्जनको खर्चमा गरेको सर्वेक्षणमा नेपालको राजधानी काठमाडौं विश्वमा नै चौथो सस्तो सहर बनेकोपाइएको छ ।सर्वेक्षण अनुसार सन् २०१४ मा काठमाडौं बस्नका लागि विश्वकै चौथो सस्तो सहर बनेको छ । काठमाडौंसँगै गृहयुद्धले तहसनहस भएकामध्ये पूर्वमा रहेको सिरियाको राजधानी दमास्कस पनि विश्वका सस्ता सहरमा चौथो स्थानमा रहेको छ । न्युयोर्कलाई आधार रेखा मानेर विश्वका १ सय ३१ सहरमा गरिएको सो सर्वेक्षणमा भारतको मुम्बई विश्वमा नै सबैभन्दा सस्तो सहर बनेको छ ।
त्यस्तै, पाकिस्तानको कराँची र भारतकै नयाँ दिल्ली क्रमश: दोस्रो र तेस्रो सस्तो सहर बनेका छन् । सो सर्वेक्षणअनुसार सिंगापुर सबैभन्दा महँगो सहर सिद्ध भएको छ । सिंगापुर लुगा किन्नका लागिसमेत विश्वमा नै सबैभन्दा महँगो सहर सावित भएको छ । मूल्यवृद्धि र बलियो मुद्राका कारण सिंगापुरलाई सो स्थानमा पु–याएको बताइन्छ ।
गत वर्ष सबैभन्दा महँगो बनेको सहर अहिले छैटौं स्थानमा झरेको छ भने दोस्रो र तेस्रोमा क्रमश: पेरिस र ओस्लो बनेका छन् ।त्यस्तै, जुुरिच, सिड्नी र भेनेजुयला क्रमश: चौथो, पाँचौं र छैटौं महँगा सहर भएको सो सर्वेक्षणले देखाएको छ । त्यस्तै, जेनेभा र मेलबर्न पनि छैटौं स्थानमा रहेका छन् ।