२०७० श्रावण ३० गते, बुधबार

काठमाडौं ,३० साउन । मेगा बैंक लिमिटेडले बुधबार प्रकाशन गरेको गत आवको आन्तरिक लेखापरीक्षण प्रतिवेदनअनुसार गत आर्थिक वर्ष २०६९/०७० मा १७ करोड ७४ लाख रुपैयाँ खुद मुनाफा आर्जन गरेको जनाएको छ । यो मुनाफाबाट नगण्यमात्र लाभांश दिन सक्ने हुँदा लाभांशको आशा गरेका सेयरधनीले कम्तीमा एक वर्ष पर्खनुपर्ने भएको छ । बैंकको प्रतिसेयर आम्दानी ७.६१ रुपैयाँ रहेको छ । खुद मुनाफाको २० प्रतिशत अनिवार्य जगेडा कोषमा जम्मा गर्नुपर्ने नियम रहेका कारण बैंकको खुद मुनाफामध्ये ३ करोड ५ लाख रुपैयाँ त्यसका लागि छुट्टाउनुपर्छ ।
बैंकले यसअघिको नाफाबाट ७ करोड रुपैयाँ ५३ लाख रिटेण्ड अर्निङ्ग बचत गरेको छ । त्योसहित बैंकले अब सेयरधनीलाई प्रतिफल दिनसक्ने अधिकतम कोष २१ करोड ७१ लाख रुपैयाँ हुन्छ । बैंकले सम्पूर्ण कोषबाट लाभांश दिने निर्णय गरी नेपाल राष्ट्र बैंकबाट स्वीकृति प्राप्त भएमा बढीमा ९ प्रतिशतसम्म लाभांश बाँड्न सक्ने देखिन्छ ।
मेगाले अघिल्लो आर्थिक वर्षको तुलनामा खुद मुनाफा १४८ प्रतिशतले वृद्धि गरेको हो । अघिल्लो आर्थिक वर्षमा बैंकले ७ करोड १९ लाख रुपैयाँ खुद मुनाफा गरेको थियो । बैंकको जगेडा कोष २३ करोड ३० लाख रुपैयाँ रहेको छ । बैंकको प्रतिसेयर नेटवर्थ ११४ रुपैयाँ पुगेको छ ।
२ अर्ब ३३ करोड रुपैयाँ चुक्ता पुँजी रहेको बैंकले यही वर्ष साधारण सेयर जारी गरेको हो । यस बैंकको सेयरमा २२ गुणा बढी आवेदन परेको थियो । आज बुधबारबाट बैंकको सेयर रजिष्ट्रारले साधारण सेयरधनीलाई प्रमाणपत्र वितरण सुरु गरेको छ । नेप्सेमा सूचीकृत नहुँदै अनौपचारिक रुपमा मेगाको सेयर प्रतिकित्ता १८० रुपैयाँको हाराहारीमा बिक्री भइरहेको छ ।
बैंकले गत आर्थिक वर्षको अन्तसम्म निक्षेप संकलन १२ अर्ब ४१ करोड ६८ लाख रुपैयाँ पुर्‍याएको छ । २०६९ असारमा ८ अर्ब ८५ करोड ५७ लाख रुपैयाँ रहेकोमा ४० प्रतिशतको वृद्धि हासिल गरेको हो । त्यस्तै, कर्जा प्रवाह पनि ७ अर्ब ९३ करोड रुपैयाँबाट ४४ प्रतिशत वृद्धि गरेर ११ अर्ब ४६ करोड रुपैयाँ पुर्‍याएको छ ।
बैंकले गत आर्थिक वर्षमा अनियमित भएको ऋणबापत १५ करोड २३ लाख रुपैयाँ प्रोभिजन गर्नुपरेको छ । बैंकको खराब कर्जा अनुपात २.२७ प्रतिशत पुगेको छ । यस बैंकको पुँजी लागत ५.४९ प्रतिशत र बेस रेट १०.३३ प्रतिशत रहेको छ । त्यस्तै, स्प्रेड दर ४.७२ बिन्दु रहेको बैंकले जनाएको छ । गत असार मसान्तमा बैंकको पुँजीकोष समायोजित कर्जा निक्षेप अनुपात ७६ प्रतिशत रहेको छ ।