२०७० असार १६ गते, आईतवार

विराटनगर, १६ असार । अवैध कारोबार तथा चोरी तस्करीमाथि गरिएको कडाइका कारण विराटनगर भन्सार कार्यालय रानीले चालु आवको १२ महिनामा रु १२ अर्ब ७७ करोड २१ लाख राजस्व सङ्कलन गरेको छ ।सो कार्यालयले आव २०६८÷६९ को तुलनामा करिब रु दुई अर्ब बढी राजस्व सङ्कलन गर्न सकेको छ । गत आवमा कुल रु १० अर्ब मात्र राजस्व सङ्कलन भएको थियो ।कार्यालय प्रमुख राजेन्द्र दाहालका अनुसार बन्द, हड्ताल तथा सीमावर्ती जोगवनी भन्सार केही दिन बन्द भैकन पनि चालु आवमा लक्ष्यको तुलनामा अत्यधिक राजस्व सङ्कलन भएको छ ।कार्यालयले चालु आवमा रु १२ अर्ब ५२ लाख राजस्व सङ्कलन गर्ने लक्ष्य राखेको थियो ।
भन्सार राजस्व रु चार अर्ब ३९ करोड २८ लाख, मूल्य अभिवृद्धि कर रु सात अर्ब ३५ करोड ९६ लाख, अन्तःशुल्क रु ७४ करोड २४ लाख ९५ हजार तथा सडक सुधारबापत रु २८ करोड ६० लाख राजस्व सङ्कलन भएको कार्यालयले जनाएको छ ।चालु आवमा कार्यालयले तोकिएकोभन्दा कम राजस्व बुझाउने आधा दर्जन भन्सार एजेन्टलाई कारबाही गरी जरिवानासमेत गरेको थियो ।