होटलभित्रको गतिविधिलाई गोप्यरुपमा भिडियो खिचेर बेच्ने पक्राउ
२०७५ चैत्र ७ गते, बिहीबार
काठमाडौं , ७ चैत । दक्षिण कोरियाका विभिन्न होटलका कोठामा हुने गतिविधिको गोप्यरुपमा भिडियो बनाएर वेबसाइटमा बेचेको आरोपमा चार जना पक्राउ परेका छन् । पक्राउ परेकाहरुले होटलका कोठामा राखिएका टेलिभिजन, हेयर ड्रायर र शोकेसहरुमा क्यामरा जडान गरी १ हजार ६ सय वटा भिडियो खिचेको फेला परेको हो । उनीहरुले यसबाट ६ हजार २ सय डलर कमाएको दाबी अधिकारीहरुले गरेका छन् । पक्राउ परेकाहरु दोषी ठहर भएमा १० वर्षसम्मको जेल र २६ हजार ५ सय डलरभन्दा बढी जरिवाना हुने छ । दक्षिण कोरियामा गुप्तरुपमा अस्लिलता फैलाउने काम भएको भन्दै त्यसको विरोधमा प्रदर्शनसमेत भएको थियो । पक्राउ परेकाहरुले गत अगष्टमा मात्रै दक्षिण कोरियाका १० शहरका ३० वटा होटलमा क्यामरा जडान गरेको देखिएको प्रहरीले जनाएको छ । कतिपय भिडियो शौचालय र चेन्जिङ रुममा खिचिएको थियो ।
गत नोभेम्बरमा उनीहरुले एउटा वेबसाइट बनाएर ३० सेकेन्टसम्मको भिडिया निःशुल्क देखाउने र त्यसपछि पुरै भिडिया हेर्ने भए शुल्क तिर्नुपर्ने व्यवस्था गरेका थिए उनीहरुले अवैधरुपमा ८ सय ३ वटा भिडियो वेबसाइटमा पोस्ट गरेका थिए । अनुसन्धानका क्रममा प्रहरीले ९७ जनाले यसका लागि पैसा तिरेको देखिएको छ ।
यसै महिना भने प्रहरीले त्यो वेबसाइट बन्द गराइदिएको थियो । सोल प्रहरीका प्रवक्ताले मानवीय गरिमामा गम्भीर हानी पुर्याउने काममा संलग्नहरुलाई कडा कारबाही गर्ने चेतावनी दिएका छन् ।-एजेन्सी
