२०७७ असार २५ गते, बिहीबार

काठमाडौं , २५ असार । अविरल वर्षासँगै गएको पहिरोले बाह्रबिसे नगरपालिकाको जम्बुमा दुई जनाको मृत्यु भएको छ भने १८ बेपत्ता भएका छन् । बाह्रबिसे पाँच जम्बुको याक्ला ठाडो खोलामा आएको बाढीले बगाउँदा जम्बुका २० वर्षीय निकेश बस्नेत र उनको तीन वर्षीया छोरीको मृत्यु भएको छ । निकेशकी श्रीमती भने भाग्दाभाग्दै बांचेकी थिइन् । बेपत्ता हुनेमा जम्बुका १४ जना र भोटेकोशी गाउँपालिकाका ४ जना छन् ।
भोटेकोशीको नयाँपुल नजिकैको झ्याले भन्ने स्थानको ठाडो खोलामा आएको बाढीमा परेर एकै परिवारका ४ जना गरी जम्मा १८ जना अझै बेपत्ता भएको प्रमुख जिल्ला अधिकारी उमेश कुमार ढकालले जानकारी दिए । भोटेकोशी गाउँपालिकाका बेपत्ता हुनेमा निमादोर्जे लामा, उनकी बुहारी मन्जु, नातीहरु अन्दाजी वर्ष ६ का सापल र ९ का पासाङ रहेको छन् ।
यता जम्बुमा वेपत्ता हुनेहरुको भने सनाखत भइसकेको छैन् । उनीहरुको सेना, प्रहरी र स्थानीय मिलेर खोजी कार्य भइरहेको छ । प्रजिअ ढकालका अनुसार दुई ठाउँमा भएको घटनामा दुई बालबालिकासहित पाँच जना घाइते भएका छन् । बाढीका कारण १३ घर पूर्ण रुपमा क्षति भएको छ ।
घटनास्थल जाने बाटो पहिरोले अवरुद्ध भएकाले सुरक्षाकर्मी पनि ढिलो पुगेका थिए । स्थानीयका अनुसार बाढी आएको थाहा पाएपछि बजारबासीको रातारात भागाभाग भएको थियो । मुख्यतः ठाडो खोलाले लेदो माटो र ढुंगा बगाएर ल्याएपछि बस्ती बगाएको थियो । राती करिव १२ बजे बाढी आएकाले सवै सुतेको अवस्थाका भाग्न कठिन भएको स्थानीयको भनाई छ । राजमार्गको बाह्रबिसे तातोपानी खण्डको खागदलदेखि लिपिङसम्मको सडक जताततै बगाएको छ । जुरे पहिरो नजिक पनि करिब सय मिटर सडक बाढीले बगाएको छ ।
यता बाह्रबिसेबाट सुनकोशी जाने बाटोमा सडकमा पनि पहिरो खसेको छ । यसैबीच घाइतेहरुको उद्धार गर्न सभामुख अग्नि सापकोटासहितको टोली धुलिखेल पुगेर फर्केको छ । मौसममा आएको खराबीका कारण नेपाली सेनाको हेलिकप्टरमा गएका उनीहरु बीचबाटोबाटै फर्किएका हुन् ।