समयको महत्व – बलराम तिमल्सिना

२०७५ श्रावण १२ गते, शनिबार

समयमा दवाइएन भने ट्रिगर
शिकारले स्थान वदल्छ
हुन्छ के भने नि साथी-
शिकारको सट्टा शिकारी ढल्छ !
तिम्रो निशाना सही छ भने
ट्रिगर दवाऊ हेरेर नबस
हेरेर बस्नेहरू हेरेकोहेरै हुन्छन् !

समयले उठाएका प्रश्नहरूको
समयमै दिनु पर्छ जवाफ
कैलेकाहीं यस्तो हुन्छ-
ढिलो गरी दिएको उत्तरले काम गर्दैन
अर्थात कसैले पहिलै दिन्छ उत्तर
र पहिरिन्छ विजयको माला !

हरेक कुरा ठीक समयमा हुनु पर्छ
विरुवा उम्रनु
आन्दोलन चलाउँनु
ताँदोबाट तिर छोड्नु
या मुखबाट केही ओकल्नु !

ठीक समयमा भएनन् भने यी कुरा
विरुवा उम्रन्छ- फल लाग्दैन
आन्दोलन चल्छ- अघि बढ्दैन
तिर चल्छ- शिकार ढल्दैन
बोली खुस्कन्छ – प्रभाव छोड्दैन !

हेर साथी !
सही समय छानिएन भने
‘आइ लभ यु’ भन्दा पनि
प्रेम बस्दैन बरु उल्टो
गालामा चप्पलको डाम बस्छ !

जव मायाँ गर्छु भन्न त समय चाहिन्छ
भन त साथी –
अनेक अप्ठेरा कुरा गर्न
समय कति निर्णायक होला ?

प्रतिक्रियाहरु