२०७१ फाल्गुन १३ गते, बुधबार

काठमाडौ, १३ फागुन । शिक्षा मन्त्रालयले प्राविधिक शिक्षालाई प्रभावकारी बनाउन बोर्ड गठन गरेर अघि बढ्ने तयारी गरेको छ । अहिले विभिन्न मन्त्रालयले भिन्दा भिन्दै रुपमा दिँदै आएको प्राविधिक शिक्षालाई एकै निकायबाट दिने व्यवस्था गर्नुका साथै प्रभावकारी पाठ्यक्रम विकास गर्न तयारी भैरहेको शिक्षा मन्त्रालयका सहप्रवक्ता सरस्वती पोखरेलले बताइन । उनले फन्ड बोर्ड बनाएर एकै ठाउँबाट प्राविधिक शिक्षा दिने व्यवस्था कार्यान्वयनका लागि छलफल भैरहेको बताइन ।
अहिले उद्योग मन्त्रालय, स्वास्थ्य मन्त्रालय, कृषि मन्त्रालय, श्रम तथा रोजगार मन्त्रालयलगायतले छुट्टाछुट्टै रुपमा प्राविधिक तालिम संचालन गर्दै आएका छन् । ती तालिमबाट युवाले सीप सिकेपनि पूर्ण दक्षता हासिल गर्न नसकेको साथै रोजगारी पाउन पनि समस्या देखिएपछि प्राविधिक शिक्षालाई गुणस्तरीय र प्रभावकारी बनाउन यस्तो योजना अघि सारिएको हो ।
शिक्षा मन्त्रालयले नै आवश्यकता तथा समयानुकुल पाठ्यक्रम विकास गरेर प्राविधिक तालिमलाई व्यवस्थित बनाउने उद्देश्य रहेको सहप्रवक्ता पोखरेलले बताइन।