२०७४ जेष्ठ १३ गते, शनिबार

काठमाडौं, १३ जेठ । पत्रकार दीपेन्द्र रावल ‘कृष्ण सेन ‘इच्छुक’ स्मृति राष्ट्रिय पत्रकारिता पुरस्कार’बाट पुरस्कृत भएका छन् । इच्छुकको १५औं स्मृति दिवसको अवसरमा क्रान्तिकारी पत्रकार संगठन नेपालले जनपक्षीय पत्रकार रावललाई पुरस्कृत गरेको हो ।
पुरस्कृत रावल संगठनका केन्द्रीय उपाध्यक्ष छन् । छनौट समितिको सिफारिसमा संगठनले स्मृति पुरस्कार रावललाई दिने निर्णय गरिएको संगठनका केन्द्रीय अध्यक्ष प्रभात चलाउनेले जानकारी दिए । पुरस्कारको राशी १० रुपैयाँ रहेको छ ।
मिडिया क्लब संवाद डबलीका अध्यक्ष एवं अनलाइन डबली डटकमका प्रकाशक समेत रहेका पत्रकार रावललाई शनिबार प्रभातफेरीपछि नेपाल पत्रकार महासंघ डा. महेन्द्र विष्ट र सेनकी जीवन सगिनी तक्मा केसीले दोसल्ला ओढाई सम्मान गरेका थिए । रावल जनयुद्धका घाइते पत्रकार हुन् । उनले सानै उमेरमा युद्ध पत्रकारिताबाट पत्रकारिता जीवन शुरु गरेका हुन् । संगठनले आज १५औं कृष्ण सेन ‘इच्छुक’ स्मृति दिवस मनाएको छ ।