२०७३ बैशाख २० गते, सोमबार

काठमाडौं, २० वैशाख । महानगरीय प्रहरी अपराध महाशाखाले क्यानडाको नक्कली भिसा लगाइ लाखौं रुपैयाँ ठगी गर्ने कन्सल्टेन्सी सन्चालकलाई पक्राउ गरेको छ । महाशाखाले काठमाडौंको बसुन्धरास्थित प्रवल एजुकेसन कन्सल्टेन्सीका सन्चालक डेन्जिन लामालाई पक्राउ गरेको हो । पक्राउ परेका लामाले क्यानडा पठाइदिने भन्दै विभिन्न व्यक्तिबाट लाखौं ठगी गरेको आरोप प्रहरीले लगाएको छ । उनले रामेछापका राजु श्रेष्ठ, देवेन्द्र सुनुवार, दोलखाका विवेकराज कार्की र भक्तपुरका रमेशकुमार केसीलाई क्यानाडा पठाइदिने भन्दै जनही १५ लाख रुपैयाँ माग गरेका थिए । क्यानाडा जान चाहने उनीहरुले पहिलोपटक ५० हजार बुझाएको र पछि लामाले नक्कली भिसा देखाएर बाँकी रकम माग गरेको प्रहरीले जनाएको छ । उनको कन्सल्टेन्सी शैक्षिक परामर्श केन्द्रमा दर्तासमेत नभएको भेटिएको पनि प्रहरीले जनाएको छ ।