२०७१ पुष १ गते, मंगलवार

काठमाडौं । नेपाल घरेलु तथा साना उद्योग महासंघले चौंथो लघु, घरेलु कृषि, वनजन्य औद्योगिक प्रदर्शनी एवं कफी, लप्सी तथा सुन्तला महोत्सव पर्वतको कुश्मामा गर्ने भएको छ ।महासंघले सोमबार काठमाडौंमा पत्रकार सम्मेलन गरि प्रदर्शनी तथा महोत्सव पुस ९ गतेदेखि १५ गतेसम्म पर्वतको कुश्मामा गर्न लागेको जानकारी दिएको हो । महासंघले स्थानीय उत्पादनको उपभोग गरौं, लघु घरेलु उद्यमीलाई प्रोत्साहन गरौं भन्ने नाराका साथ गर्न लागिएको महोत्सवमा २ सय ५० भन्दा बढी उद्यमीका उत्पादन राखिने बताएको छ ।
डेढ करोड रुपैयाँको आर्थिक कारोबार हुने अपेक्षा गरिएको महोत्सवमा ८० प्रतिशत स्टल बुकिङ भैसकेको महासंघका अध्यक्ष सुरेश प्रधानले बताउनुभयो । अल्लोका कपडा, लोक्ताको नेपाली कागज, हस्तकलाका सामाग्री, कफी, सुन्तला, मह, जडिबुटी, ट्राउट माछा र अन्य कृषि उत्पादनका १ सय ५० वटा स्टल रहने महोत्सवमा भलिवल, छेलो फाल्ने, लठ्ठा तान्ने, लोकदोहोरी लगायतका प्रतियोगिता पनि समावेश गरिने छन् । महोत्सवमा जाने सबै अवलोकनकर्तालाई उपहारको व्यवस्था गरिएको छ ।
पर्वत जिल्ला लप्सी, सुन्तला र अल्लोका लागि प्रख्यात रहेकाले महोत्सव कुश्मामा राखिएको आयोजकको भनाइ छ । महोत्सव २ लाख मानिसले अवलोकन गर्ने आयोजकको अनुमान छ । नेपाल घरेलु तथा साना उद्योग महासंघले ५ वर्षपछि महोत्सव गर्न लागेको हो ।