२०७२ मंसिर ३ गते, बिहीबार

काठमाडौं, ३ मंसिर । चीनले अनुदानमा दिएको सबै पेट्रोल हिजो सांझ नेपाल भित्रिएको छ । हिजो केरुङ नाका हुंदै ३५ वटा ट्याङकरबाट बांकी रहेको ३ लाख २२ हजार लिटर पेट्रोल नेपाल ल्याइएको हो । उक्त सबै पेट्रोल रसुवागढीबाट बिहीबार काठमाडौं ल्याईंदै छ । भन्सार जाँचपास गरी तिर्नुपर्ने बाँकी ५ लाख ४५ हजार रकम समेत चुक्ता भएको रसुवा भन्सार कार्यालयका प्रमुख केदार पनेरुले जानकारी दिए ।
चीनले नेपाललाई अनुदानमा १३ लाख लिटर पेट्रोल उपलब्ध गराएको थियो । नेपाली ट्याङकरले अफ्ठारो बाटो पार गर्दै चीनको केरुङ भन्दा ४ किलोमिटर माथि पुगेर इन्धन भरी नेपाल आएका थिए ।
नेपाल भित्रिएका सबै पेट्रोल थानकोट डिपोमा राखिएको छ । चीनले अनुदानमा दिएको पेट्रोलियम पदार्थ युरो स्ट्यान्डर चार रहेको नेपाल आयल निगमले जनाएको छ । साँघुरो सडक र कच्ची बाटो भएकाले १२ हजार लिटर क्षमता भएका नेपाली ट्याङकरले ७ देखि ९ हजार लिटरका दरले पेट्रोल ढुवानी गरेका थिए ।