२०७६ असार ८ गते, आईतवार

काठमाडौँ , ८ असार । आज बसेको राज्यव्यवस्था समितिको बैठकमा नेपाल कम्युनिस्ट पार्टीका सर्लाही जिल्ला इन्चार्ज तथा जनकपुर ब्युरो सदस्य कुमार पौडेललाई प्रहरीले नियन्त्रणमा लिएर हत्या गरेको भन्दै गृहमन्त्रीले जवाफ दिनुपर्ने माग भएको छ ।
बैठकमा सत्तारूढ दलका नेता जनार्दन शर्माले सर्लाहीमा प्रहरीको दोहोरो भिडन्तमा मारिएका विप्लव समूहका नेता कुमार पौडेको हत्या गम्भीर भएको भन्दै आपत्ति जनाएका थिए ।उनले भने, ‘कुमार पौडेलको हात भाँचिएको भन्ने उजुरी परेको छ, यसको सत्यतथ्य समितिलाई गृहमन्त्रीले जानकारी दिनुपर्छ।’ त्यस्तै शर्माले रेशम चौधरीलाई अस्पतालमै नेल लगाएर राख्नु अनुचित भएको भन्दै प्रधानमन्त्रीले निर्देशन दिएर फुकाउनु राज्य संयन्त्रको उपहास भएको शर्माको भनाइ थियो। कुमार पौडेल र रेशम चौधरीका घटना गम्भीर भएको भन्दै गणतन्त्रलाई असफल पार्न सबैतिरबाट हमला भइरहेको उनले बताए। त्यस्तै लोकसेवाको विज्ञापनमा समावेशी नबनाइनु संविधान र कानुनविपरीत भएको शर्माको धारणा थियो। समितिमा नेपाली कांग्रेसकी नेतृ डिला संग्रौलाले पनि पौडेललाई नियन्त्रणमा लिएर हत्या भएको भन्दै छानबिन गर्न माग गरिन्। समितिले गृहमन्त्री रामबहादुर थापालाई यसबारे जवाफ माग्न सोमबार समितिको बैठकमा बोलाएको छ।